أنا هبة، وكل مرة باتعامل فيها مع طاقة المصريين القدماء، بكتشف طبقات أعمق من الوعي والقوة والرسوخ. المصري القديم ماكانش بيعبد آلهة، كان بيتعامل مع رموز كونية، طاقات حيّة بتعيش معانا وبيننا. من أعمق الطاقات اللي شعرت بيها وأثّرت فيّ بشكل مباشر كانت طاقة سِخمت.
كثير من الناس لما تسمع عن سخمت، يتقالهم إنها "إلهة الغضب"، أو "الدمار"، أو "العقاب"، وده مفهوم ناقص تماماً، أو متشوّه. الحقيقة إن سِخمت مش رمز للخراب، بل هي طاقة لا يصح إلا الصحيح. هي الصحوة. هي صوت الحقيقة لما يُقال بوضوح. هي طاقة العدل الكوني، اللي بترجع كل شيء لمكانه الحقيقي. مش بتهجم، لكن لما الظلم يزيد، بتصحى طاقتها. لما الحد يتخطى، بترجع الأمور لتوازنها.
سِخمت بتعلّمني كل يوم إن النقاء مش ضعف، وإن القوة مش قسوة. وإن اللي واقف على أرضه بثبات، لا يمكن يهتز، حتى لو كل الدنيا حوالينه بتتهز.
تجربتي مع سِخمت؟
من أول ما بدأت أشتغل مع طاقتها، لاحظت حاجة عميقة بتحصل: أي نية سلبية نحوي، حتى لو ماوصلتش ليّ، كانت بترتد لصاحبها. أي حد حاول يأذيني بفكرة، بكلمة، بنية غير نقية، كانت طاقتها بتردها ليه. مش من باب الانتقام، لكن من باب "كل شيء يعود لأصله".
شعرت بحماية ناعمة لكن صارمة، حسّيت بثقة في نفسي مش نابعة من برّه، لكن من جوايا. من صوت قديم، مصري، بيقولي: "انتصري. وقفي. بصي في عين الشمس."
وسِخمت مش بس طاقة ردّ الظلم، لكنها كمان بتوقظ جوه كل أنثى نداء العدل الداخلي. بتحررها من شعور العجز أو الخوف أو التنازل. بتفكرها إنها بنت النور والنار، ومش لازم تختار بينهم... لإنها الاتنين.
ومن هنا، جت دورة "سِخمت"
مش مجرد جلسات أو تأملات. دي رحلة استرجاع قوة، وعي، حكمة... وحق.
في الدورة هنجمع بين العمل الطاقي العميق، التأملات، وطقوس التشافي.
هنفك طبقات الكبت، ونرجع للأنثى القديمة اللي كانت تعرف تحمي، تشفي، وتحب... من غير ما تنسى نفسها.
لو حسيتي إن الوقت جه ترجعي لمجدك الداخلي،
لو تعبتي من محاولات التشافي اللي ماوصلتكش للقوة اللي جواك،
لو فيكي غضب، بس محتارة ترجعيه نور...
أدعو كل أنثى تسمع النداء تشترك معايا في دورة "سِخمت".
دي مش بس دورة...
ده نداء ، نداء سخمت استدعاء للقوة اللي جواك.
هبه سعيد